साफ सफाई राखव रे भाई।
येमा सबके हे गजब भलाई।।
साफ रखव पीये के पानी।
बच जाही जम्मों जिनगानी।।
साफ सफाई सत सुखदानी।
झन करहू गा आनाकानी।।
जिनगी खातिर करलव चतुराई।
साफ सफाई राखव रे भाई।
येमा सबके हे गजब भलाई।।-1
गली खोर ले कचरा टारव।
घर अँगना ला रोजे झारव।।
रउँदन-गउँदन घुरुवा डारव।
कचरा काड़ी सकला बारव।।
भीतर बाहिर राहव सुघराई।
साफ सफाई राखव रे भाई।
येमा सबके हे गजब भलाई।।-2
पेड़ लगावव भाँठा परिया।
फुरहुर हावा, तन-मन फरिया।।
छँटही धुँगिया करिया करिया।
धरती सुग्घर जाही हरिया।।
झन काटव कभू ‘अमित’ रुख राई।।
साफ सफाई राखव रे भाई।
येमा सबके हे गजब भलाई।।-3
कन्हैया साहू ‘अमित’
शिक्षक-भाटापारा छत्तीसगढ़
गोठबात~ 9200252055