*घर बईठे कनो राजा नइ होय*

घर बईठे कनो राजा नइ होय, 

रोज जंग लडे़ ल पड़थे जी

दूनों हांथ के लकीर मा

रोज रंग भरे ल पड़थे जी

चुनौती संग लड़-लड़के

रोज पग धरे ल पड़थे जी

आन के आँसू पोंछे खातिर

अपन आँसू पिए ल पड़थे

अपन जिनगी अपन नाहीं

बस आन बर जिए ल पड़थे

नीत-नियाव पोथी गढे़ बर, 

संसार ल पढे ल घलो पड़थे जी

अकास धरे आरती थारी, 

सुरूज जोत ल बारे हे

सुवागत के सेज सजाहे, 

चंदा-चंदेनी ल साजे हे

वो चम-चम मंजिल पाए बर, 

बादर ल चीरे ल घलो पड़थे जी

रंग-बिरंग के तरंग सुघर, 

अगोरत हाबे तोला

इतिहास चंदन करे बर,

जोहत हाबे तोला

शिव शंकर शंभू बने बर, 

जहर ल पिये ल घलो पड़थे जी

---

लोकनाथ साहू ललकार 

दुर्ग (छत्तीसगढ़)

मोबाइल-9981442332